Legjionarët shqiptarë spikatin në fundjavë, shënojnë Manaj dhe Ajeti

Legjionarët shqiptarë ishin protagonistë në fundjavë, duke dhënë kontribut të rëndësishëm për klubet e tyre. Paraqitjet e tyre gëzojnë edhe trajnerin e Kombëtares, Sylvinho, i cili po përgatitet për ndeshjen e 26 marsit në transfertë ndaj Polonia, për llogari të “play-off”-it të Botërorit.

Rey Manaj ishte protagonist në Turqi, duke i dhënë fitoren Sivasspor në transfertë ndaj Serik Spor, me golin e vetëm të takimit në minutën e 48-të.

Edhe mbrojtësi Arlind Ajeti gjeti rrugën e rrjetës, duke shënuar në fitoren 3-1 të Bodrumspor në transfertë ndaj Hatayspor.

Në Turqi spikati edhe Qazim Laçi, i cili regjistroi asistin e gjashtë sezonal në kampionat në fitoren 3-0 të Rizespor ndaj Kasimpasa. Mesfushori numëron gjithashtu tre gola këtë sezon.

Formë fantastike po kalon edhe Anis Mehmeti, që realizoi golin e parë në fitoren 3-0 të Ipswich Town ndaj Swansea City. Ky ishte goli i 10-të sezonal për të, ndërsa ka dhënë edhe 7 asiste.

Gol shënoi edhe Cristian Shpendi, që realizoi në barazimin 1-1 të Cesena në transfertë ndaj Empoli. Shpendi zhbllokoi takimin në minutën e 29-të.

Titullarë me skuadrat e tyre këtë javë u aktivizuan edhe Thomas Strakosha, Mario Mitaj, Berat Gjimshiti, Ardian Ismajli, Klisman Cake, Kristjan Asllani, Ylber Ramadani, Juljan Shehu, Adrion Pajaziti, Jasir Asani, Myrto Uzuni dhe Ernest Muçi.