Lirohet drejtori i burgut të Rrogozhinës Bilal Hasa, rezulton pa lidhje me ngjarjen! Në kërkim vëllai i tij

Drejtori i burgut të Rrogozhinës, Bilal Hasa, është liruar nga paraburgimi, ndërsa hetimet për dy magazinat e kanabisit të zbuluara në Peqin do të vazhdojnë në gjendje të lirë. Për rastin, është shpallur në kërkim vëllai i tij.

Policia njoftoi se gjatë operacionit të zhvilluar të enjten në fshatin Kurtaj, njësia administrative Gjocaj, u kontrollua bodrumi i një magazine, ku u gjetën dy ambiente të përshtatura për kultivimin e bimëve narkotike me llamba, me rreth 4,000 bimë kanabis.

“Bazuar në informacionet operative dhe në kuadër të planit për goditjen e kultivimit të bimëve narkotike në ambiente të mbyllura, shërbimet e Policisë, në kuadër të operacionit të koduar ‘Kurtaj’, ushtruan kontrollin në bodrumin e magazinës. Ambienti rezultoi në pronësi të shtetasit Bilal Hasa, i cili u shpall në kërkim. Po ashtu, për veprën penale ‘Shpërdorimi i detyrës’, është shpallur në kërkim edhe shtetasi E. M., përgjegjës i OSHEE-së për zonën e Peqinit”, njoftoi Policia e Shtetit.

Operacioni vijon nën drejtimin e Prokurorisë së Elbasanit, ndërsa autoritetet punojnë intensivisht për identifikimin dhe ndjekjen penale të personave të tjerë të përfshirë në këtë veprimtari kriminale.