Mashtroi 35 biznese duke u hequr si zyrtar i shtetit, arrestohet 26-vjeçari në Gjirokastër

Policia e Gjirokastrës ka arrestuar një 26-vjeçar i cili mashtronte bizneset dhe subjektet tregtare duke u paraqitur si punonjës i IKMT-së, AKU-së, Tatim-Taksave etj.

Në kuadër të operacionit të koduar “The End”, u kap në flagrancë, në qytetin e Sarandës, duke marrë nëpërmjet mashtrimit një shumë prej 56 000 lekë të reja nga një shtetas, dhe u vu në pranga shtetasi L. M., 26 vjeç, banues në Sarandë.

“Nga hetimet e kryera është dokumentuar se shtetasi L. M., ka mashtruar, me qëllim përvetësimin e shumave të parave, 35 biznese dhe subjekte tregtare në qytete të ndryshme si në Gjirokastër, Tepelenë, Përmet, Vlorë, Himarë, Orikum, Fier, Berat etj., ku për çdo rast përfitonte shuma nga 200 deri në 600 euro”, tha policia.

Vijon hetimi me qëllim dokumentimin ligjor të kësaj veprimtarie.