“I aftë në çdo rol sulmues”, Ancelotti: Endrick do të jetë e ardhmja e Brazilit

Trajneri i Brazilit, Carlo Ancelotti, në konferencën për shtyp para ndeshjes miqësore ndaj Kroacisë, u ndal edhe te talenti i ri brazilian, Endrick, i cili aktivizohet me Lyonin në Francë.

Sipas trajnerit të “Seleçaos”, lojtari i huazuar nga Real Madridi është i aftë të luajë në të gjitha pozicionet sulmuese dhe, me kalimin e kohës, do të ketë gjithnjë e më shumë hapësira me ekipin kombëtar të Brazilit.

“Fillimisht e njihja Endrick-un si një qendërsulmues, por tani ai luan më shumë në krah. Ai po bën shumë mirë edhe në atë pozicion. Natyrisht, është një pozicion që kërkon më shumë punë mbrojtëse, por duke pasur parasysh moshën dhe madhësinë e tij, ai e përballon atë shumë mirë dhe është plotësisht i aftë. Ne po e ndihmojmë të zhvillohet dhe ai po përmirësohet shumë mirë. Është e qartë se Endrick, si shumë të tjerë, do të jetë pjesë e së ardhmes së ekipit kombëtar, pa dyshim. Ne kemi disa lojtarë të rinj shumë interesantë për të ardhmen”, tha ai.