U kap me armë brenda në një lokal, arrestohet 36-vjeçari në Fushë Krujë! Procedohet pronari

Një 36-vjeçar është vënë në pranga nga policia, pasi u kap me pistoletë në një lokal në Fushë Krujë.

Sipas raportimeve nga policia, në pranga ka rënë shtetasi Andi Xhafa, 36 vjeç, ndërkohë u procedua penalisht pronari i lokalit për moskallëzim krimi.

“Shërbimet e Seksionit për Hetimin e Narkotikëve të DVP Tiranë, në vijim të punës për goditjen e paligjshmërive, bazuar dhe në informacionet e siguruara në rrugë operative, kanë organizuar dhe finalizuar operacionin e koduar “Klienti”.   

Gjatë operacionit, shërbimet e Policisë kanë ndërhyrë në lokalin e shtetasit A. S., në Fushë Krujë, ku kanë lokalizuar shtetasin A. Xh., të cilit gjatë kontrollit në çantë, i kanë gjetur një armë zjarri pistoletë me krehër me municion luftarak.  

Në vijim të veprimeve për rastin, u arrestua në flagrancë shtetasi A. Xh., 36 vjeç dhe nisi procedimi penal për shtetasin A. S., 41 vjeç, të dy banues në Fushë Krujë”, thuhet në njoftimin e policisë.

Materialet procedurale i kaluan Prokurorisë, për veprime të metejshme.