Lëvizte i armatosur dhe me automjet pa targa, vihet në pranga 30-vjeçari në Kurbin

Një 30-vjeçar është vënë në pranga nga policia e Kurbinit mbrëmjen e djeshme, pasi u kap i armatosur dhe lëvizte me makinë pa targa.

Sipas raportimeve nga policia, në pranga ka rënë F. B., rreth 30 vjeç, të cilit i është sekuestruar një armë zjarri pistoletë me municion luftarak, si dhe automjeti.

“Si rezultat i administrimit të menjëhershëm të një informacioni të siguruar në rrugë operative, për një shtetas që lëvizte i armatosur, shërbimet e Komisariatit të Policisë Kurbin, në bashkëpunim me Forcën e Posaçme Operacionale “Shqiponja”, finalizuan operacionin policor të koduar “Siguria”.

Në kuadër të operacionit, në qytetin e Laçit, u ndalua shtetasi F. B., rreth 30 vjeç, banues në Milot, Kurbin.

Gjatë kontrollit të ushtruar, shërbimet e Policisë i gjetën dhe sekuestruan 1 armë zjarri pistoletë, me municion luftarak, të cilën 30-vjeçari e mbante pa leje”, thuhet në njoftimin e policisë.

Materialet procedurale iu referuan Prokurorisë pranë Gjykatës së Juridiksionit të Përgjithshëm Lezhë, për veprime të mëtejshme procedurale.