Monitoronte banesat dhe hynte me çelësa të kopjuar për t’i vjedhur, arrestohet në Tiranë 38-vjeçari

Policia e Tiranës ka vënë në pranga një 38-vjeçar pasi dyshohet se është autori i 4 vjedhjeve në banesa gjatë vitit 2026.

Sipas raportimit nga policia, në pranga ka rënë shtetasi B. H., 38 vjeç, i cili monitoronte banesat ku synonte të vidhte dhe hynte në to me çelësa të kopjuar, për të marrë para, bizhuteri dhe sende.

“Finalizohet nga Komisariati Nr. 6, si rezultat i një hetimi disamujor, operacioni i koduar “Kopja”.

Monitoronte banesat ku synonte të vidhte dhe hynte në to, me çelësa të kopjuar, për të marrë para, bizhuteri dhe sende, identifikohet dhe kapet 38-vjeçari.

Hetimi zbardhi 4 vjedhje me të njëjtën metodë, të kryera nga 38-vjeçari (me precedent të theksuar për vjedhje), gjatë këtij viti.

Sekuestrohen sende të dyshuara të vjedhura, si dhe veshje të përdorura gjatë kryerjes së krimeve.

Si rezultat i një hetimi disamujor, të kryer nga shërbimet e Komisariatit të Policisë Nr. 6, në koordinim me Prokurorinë e Tiranës, me objektiv identifikimin dhe ndalimin e autorit të disa vjedhjeve në banesa, nëpërmjet përdorimit të çelësave të kopjuar, u finalizua operacioni i koduar “Kopja”.

Gjatë operacionit u identifikua, u kap dhe u vu në pranga shtetasi B. H., 38 vjeç, autor i dyshuar i 4 vjedhjeve në banesa, me këtë metodë, gjatë vitit 2026.

Vijon puna për zbardhjen e vjedhjeve të tjera që mund të ketë kryer shtetasi B. H”, thuhet në njoftimin e policsë.

Materialet procedurale iu referuan Prokurorisë së Tiranës, për veprime të mëtejshme.