U kapën duke mbjellë fidanë kanabisi, vihen në pranga dy persona në Librazhd

Janë vënë në pranga këtë të hënë nga policia e Librazhdit dy persona, të cilët në fshatin Xhyrë u kapën në flagrancë duke kultivuar bimë narkotike.

Sipas raportimit të policisë, janë arrestuar shtetasit O. L., 24 vjeç dhe R. B., 26 vjeç, të cilët kishin kultivuar në platforma polistiroli fidanë kanabisi.

“Si rezultat i një hetimi proaktiv të kryer nga shërbimet e Komisariatit të Policisë Librazhd, në bashkëpunim me shërbimet e Drejtorisë Vendore të Policisë Elbasan dhe në koordinim me Prokurorinë, për dokumentimin e veprimtarisë kriminale të 2 shtetasve, të dyshuar të përfshirë në kultivim të bimëve narkotike, u zhvillua operacioni i koduar “Faza e parë”.

Gjatë kësaj faze të operacionit, u arrestuan shtetasit O. L., 24 vjeç dhe R. B., 26 vjeç, të dy banues në fshatin Xhyrë.

Ata u kapën në flagrancë, në zonën e pyllëzuar të këtij fshati, ku kishin kultivuar në platforma polistiroli, fidanë të dyshuar narkotikë Cannabis Sativa.

Kontrollet dhe hetimet në kuadër të operacionit anticannabis “Faza e parë”, vijojnë”, thuhet në njoftimin e policisë.

Materialet procedurale iu referuan Prokurorisë së Elbasanit, për veprime të mëtejshme.