Tensione SHBA-Iran në rritje, kërcënon Teherani: Do të shkatërrojmë industrinë rajonale të naftës nëse rifillon lufta

Si SHBA-ja ashtu edhe Irani kanë treguar gatishmëri për të rifilluar luftën nëse armëpushimi përfundon pa ndonjë përparim drejt zgjatjes së tij.

Një komandant iranian ka kërcënuar tani se do të shkatërrojë industrinë e naftës në rajon nëse rifillon lufta me SHBA-në.

“Nëse fqinjët jugorë lejojnë armikun të përdorë objektet e tyre për të sulmuar Iranin, ata duhet t’i thonë lamtumirë prodhimit të naftës në rajonin e Lindjes së Mesme”, është shprehur Gjenerali Majid Mousavi.

Kërcënimi për sulme ndaj objekteve kryesore të naftës në rajon vjen mes frikës së mungesës së karburantit të shkaktuar nga kriza e vazhdueshme në Ngushticën e Hormuzit.

Çmimi i naftës po luhatet gjithashtu pak nën 100 dollarë për fuçi, me tregjet që janë të përgatitura për lajme nëse armëpushimi do të zgjatet.