Reforma territoriale, Mazniku: 90% e çështjeve lidhen me vendoren, Boçi: Ulja e numrit të bashkive do sjellë dështim

Në qytetin e Lezhës nisi sot dëgjesa e parë me qytetarët për reformën territoriale. Gjatë fjalës së tij, bashkëkryetari socialist Arbjan Mazniku, theksoi se pjesa më e madhe e çështjeve që prekin drejtpërdrejt ekonominë e qytetarëve lidhet me qeverisjen vendore.

“Rreth 90% e çështjeve lidhen me bashkinë. A i kanë bashkitë të gjitha kompetencat? A i kanë mundësitë financiare? Si qëndron raporti mes të ardhurave që mbledhin vetë dhe atyre që marrin nga qeveria? A kanë burime të mjaftueshme teknike për të ofruar shërbimet e tyre?”, u shpreh Mazniku.

Ndërkohë, bashkëkryetari demokrat Luçiano Boçi, e quajti të dështuar reformën territoriale të vitit 2014 dhe kundërshtoi një nga skenarët e PS-së për uljen e numrit të bashkive.

“Nëse në fund PS bën atë që kërkon, uljen e bashkive pa konsensus, çfarë fitojmë? E pranuam një herë dhe çfarë solli? Dështim. Nëse ndjekim të njëjtën rrugë, do të kemi të njëjtin rezultat”, u shpreh Boçi.

Socialistët dhe demokratët bien dakord vetëm në një pikë, që harta e re territoriale duhet të shërbejë për mirëqeverisjen e pushtetit vendor. Për sa i takon numrit të bashkive, PS kërkon më pak, ndërsa PD më shumë, ndërkohë që asnjëra prej tyre nuk ka zyrtarizuar propozimin përfundimtar.