Tregtarët në tregun “Maqedonas” në Korçë mbyllin qepenat në shenjë proteste ndaj gjobave për tendat

Një pjesë e konsiderueshme e tregtarëve që ushtrojnë aktivitetin e tyre në tregun “Maqedonas” në Korçë kanë ulur qepenat këtë të martë, në shenjë pakënaqësie ndaj masave të vendosura nga autoritetet.

Sipas tregtarëve, shkak për këtë situatë janë bërë gjobat e vendosura nga policia bashkiake për mosrespektim të afateve lidhur me heqjen e tendave dhe reklamimin e mallrave që zënë hapësirat publike.

Ata thonë se nuk kanë pasur mundësi të aplikojnë për shkak të mosfunksionimit të portalit e-Albania, ndërsa disa prej tyre shprehen se në këto kushte janë detyruar të mbyllin përfundimisht aktivitetin, duke e parë emigrimin si të vetmen alternativë.

Nga ana tjetër, burime pranë Bashkisë së Korçës bëjnë me dije se tregtarët janë njoftuar prej ditësh për heqjen e tendave dhe lirimin e hapësirave publike, ndërsa për ata që nuk kanë zbatuar vendimet janë vendosur masa administrative.