Arsimi profesional fiton terren në juglindje, shkollat teknike në Korçë bëhen zgjedhje e të rinjve

Në Korçë po vihet re një rritje e ndjeshme e interesit për arsimin profesional, ku gjithnjë e më shumë të rinj po orientohen drejt zanateve si një rrugë e shpejtë dhe praktike për punësim në tregun vendas.

Shkollat teknike profesionale në juglindje po raportojnë rritje të aplikimeve, ndërsa drejtuesit e institucioneve arsimore theksojnë se kërkesa për profesionistë të zanateve është në rritje të vazhdueshme.

Drejtoresha e shkollës profesionale teknike në Korçë, Anxhela Taho, shprehet se interesi për arsimin profesional është rritur nga viti në vit dhe se këto degë janë të lidhura drejtpërdrejt me tregun e punës.

Ajo thekson gjithashtu përfitimet që marrin nxënësit, përfshirë librat falas, mbështetjen për transportin, bursat për kategori të ndryshme sociale dhe lehtësirat për nxënësit në nevojë.

Në këtë drejtim, ajo nënvizon edhe mungesën e profesionistëve në treg:

“Ne sot kemi nevojë për profesionistë, për elektricistë, hidraulikë… për të mos vuajtur për ustain.”

Një prej nxënësve, Andri Shali, tregon se arsimi profesional i ka dhënë mundësinë të kombinojë mësimin me punën dhe të përvetësojë një zanat që në moshë të re, duke u integruar gradualisht në tregun e punës përmes praktikës në biznese.

Ai thotë se përvoja në terren e ka ndihmuar të përshtatet më lehtë me kërkesat reale të punës.

Në një treg ku mungesa e profesionistëve mbetet sfidë, arsimi profesional po shihet gjithnjë e më shumë si një urë e drejtpërdrejtë mes shkollës dhe punësimit të qëndrueshëm.