Pse nuk po hapet PD? Po Nokës kush do ja zërë vendin? Flet anëtarja e këshillit kombëtar të PD

Ilirjana Kucana, anëtare e këshillit kombëtar të PD tha në emisionin Now në Euronews Albania se në këshillin e ri kombëtar të PD ka emra të rinj, intelektualë dhe profesionistë.

Ajo u shpreh se qasja e vetë kryetarit Sali Berisha është që të afrohen sa më shumë njerëz të tillë në parti, ndërsa siguroi se PD është e mbushur me të rinj e të reja që do të ofrojnë surpriza në parti.

“Interesi për të qenë pjesë e politikës sot nga intelektualët mendohet shumë. PD ka bërë hapje, duhet të bëjë edhe më shumë. Nga emrat e djeshëm ka edhe emra të rinj.

Qasja e Berishës është që të afrojmë sa më shumë intelektualë, profesionistë pranë PD-së, se PD ka programin më të mirë. Berisha e shpëtoi opozitën, e bashkoi, doli përtej dhe e bashkoi opozitën. Detyra e tij tani është të zgjedhë një ekip dinjitoz.

Statuti e thotë qartë që demokratët zgjedhin Këshillin Kombëtar, që do marrë vendime të rëndësishme. Nga ana tjetër, për pozicionet e tjera drejtuese janë propozime të kryetarit të partisë.

PD do ketë surpriza, do jetë plot me të rinj e të reja që duhet të promovohen më shumë dhe të marrin përgjegjësi.

Flamuri (Noka) ka bërë betejat e tij që janë të pamohueshme, ka bërë ato beteja atëherë kur nuk guxonte kush dhe i ka dalë në krah kur të tjerët ishin duke u menduar. Kur drejton edhe gabon, gabime ka bërë edhe kryetari dhe i ka pranuar”, tha Kucana.