Strazimiri përplaset me Lëvizjen Bashkë për protestën: 70% e qytetarëve ishin demokratë

Gjatë seancës plenare sdot në Kuvend, deputeti i Partisë Demokratike, Gent Strazimiri, pati diska replika me deputetin e Lëvizjes Bashkë, Redi Muçi. Në fjalën e tij, Strazimiri ironizoi përfaqësuesit e kësaj force politike, duke pretenduar se protesta qytetare e zhvilluar një ditë më parë ishte mbështetur kryesisht nga simpatizantë të Partisë Demokratike.

Ai kritikoi gjithashtu qëndrimet e Lëvizjes Bashkë ndaj qeverisë dhe opozitës, duke theksuar se protestat nuk duhet të përdoren për sulme politike ndaj demokratëve.

“Ti, Lenini… nuk mund të të dhimbset pelikani kaçurrel dhe flamengo ditën kur këta kanë nxjerrë fonde me terapi për të ndryshuar seksin e fëmijëve tanë. Me taksat tona, që të dhimbsen aq shumë. Atë sheshin që e ke plot aty, 60-70% e ke demokratë.

Nëse do ta hapësh këtë lojë, ne e hapim, por ty nuk të leverdis. Gjëja e vetme që ke bërë duke çuar njerëzit atje është se treçerekun e sheshit i ke larguar, se nuk është protestë politike, por qytetare. Me kujdes herë tjetër, edhe me batuta, edhe me të gjitha, fol se të përgjigjem prapë unë”, tha Strazimiri.

Nga ana tjetër, Redi Muçi hodhi poshtë etiketimet e Strazimirit, duke deklaruar se të rinjtë që protestojnë nuk identifikohen me ideologjitë e Marksit apo Leninit. Muçi u shpreh se protestuesit janë kundër të dyja partive, PS dhe PD

“Meqenëse këtu ndodh shpesh që nga të dyja krahët të më referohen mua dhe Lëvizjes Bashkë si marksistë dhe leninistë, dua t’u them që ata të rinj që protestojnë në atë shesh nuk e njohin Marksin. Ata që kur kanë hapur sytë kanë parë Sali Berishën, që kur kanë nisur të ecin kanë njohur Edi Ramën. Ata të rinj dhe të reja protestojnë kundër jush, kundër dëmit që i keni bërë këtij vendi, kundër shkatërrimit. Dilni dhe jepuni llogari. Mund të vazhdoni pafundësisht me batuta të dala boje. Ju duhet të mbani përgjegjësi për çfarë keni bërë 35 vjet dhe keni fytyrë e na drejtoheni ne”, tha Muçi.