Operacioni “Siguria” në Vlorë, sekuestrohen armë dhe drogë, dy persona në pranga

Policia e Vlorës ka finalizuar dy aksione të ndryshme në kuadër të operacionit të koduar “Siguria”, duke arrestuar dy shtetas, njëri prej të cilëve me precedent penal në fushën e narkotikëve.

I arrestuari i parë është shtetasi T. P., 33 vjeç, banues në Vlorë, i cili rezulton me precedent penal për prodhim dhe shitje të lëndëve narkotike. Gjatë kontrollit në automjetin dhe banesën e tij u gjetën një pistoletë, një krehër arme, 44 fishekë të kalibrave të ndryshëm, si dhe kokainë e ndarë në doza, e dyshuar për shitje.

Ndërsa i dyti, shtetasi A. C., 18 vjeç, u kap në zonën e Dhërmiut me sasi kokainë dhe cannabis sativa, të cilat dyshohet se i posedonte me qëllim shpërndarjen në zonat bregdetare dhe në qytetin e Vlorës.

Sipas policisë, operacioni është zhvilluar në kuadër të intensifikimit të kontrolleve në territor, me qëllim garantimin e sigurisë publike dhe goditjen e veprimtarive të paligjshme gjatë sezonit turistik.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, ndërsa hetimet vijojnë.