Ambasada e SHBA në Tiranë tregon mesazhet që përcolli Philip Reeker

Ambasada e Shteteve të Bashkuara të Amerikës ka publikuar detaje mbi vizitën e sotme në Tiranë të Ndihmës Sekretarit të Shtetit në Detyrë për Çështjet Evropiane dhe Euroaziatike, Philip Reeker.

Sipas ambasadës, z. Reeker ka theksuar vendosmërinë që ka presidenti i SHBA, Joe Biden dhe Sekretari i Shtetit Blinken për të luftuar fenomenin e korrupsionit dhe krimin e organizuar.

Një tjetër temë, e cila mori vëmendje të veçantë ishte stërvitja ushtarake “Defender Europe 21” në Shqipëri.

Shqipëria po ashtu mori përgëzime për rolin që po luan në rajon dhe më gjerë, kurse pjesa, e cila u veçua në këtë mes ishte zgjedhja e vendit tonë si anëtare jo e përhershme e Këshillit të Sigurimit në Organizatën e Kombeve të Bashkuara, mandat të cilin e merr në janar të vitit të ardhshëm.

Ambasada thotë se SHBA është e vendosur të mbështesë Shqipërinë në fuqizimin e reformave në sistemin e drejtësisë dhe në luftën kundër krimit të organizuar.

Sipas saj, fuqizimin i këtyre hallkave do të ndikojë drejtpërdrejt në fuqizimin e demokracisë, mbrojtjen e klimës së biznesit dhe përshpejtimin e rrugës së Shqiptarisë drejt pranimit në Bashkimin Evropian.

Gjatë qëndrimit në Shqipëri, Ndihmës Sekretari i Shtetit në Detyrë për Çështjet Evropiane dhe Euroaziatike, Philip Reeker u takua me kryeministrin Rama, kryetarin e PD Lulzim Basha dhe anëtarë të tjerë të sistemit të drejtësisë, të cilët janë kontrolluar nga procesi i vettingut.

LEXONI GJITHASHTU: 

• Philip Reeker vizitë sot në Tiranë, takim me Ramën dhe Bashën