INSTAT publikon shifrat: Ekonomia u rrit me 3.7% në tremujorin e parë të vitit 2026

Ekonomia shqiptare vijoi të rritet edhe në tremujorin e parë të vitit 2026, madje me një ritëm të përshpejtuar krahasuar me të njëjtën periudhë të vitit të kaluar, pas rishikimit të të dhënave. Sipas shifrave të publikuara nga INSTAT, Prodhimi i Brendshëm Bruto (PBB), në terma realë, u zgjerua me 3.71% krahasuar me të njëjtën periudhë të një viti më parë.

Publikimi u shoqërua edhe me një rishikim të të dhënave historike. INSTAT korrigjoi normën e rritjes ekonomike për tremujorin e parë të vitit 2025 në 3.53%, nga 3.83% që ishte raportuar më parë, pas përditësimit të llogarive kombëtare vjetore.

Të dhënat tregojnë se motori kryesor i ekonomisë gjatë periudhës janar-mars nuk ishte industria apo bujqësia, por sektori publik dhe shërbimet.

Kontributin më të madh në zgjerimin e PBB-së e dha grupi “Administrata Publike, Arsimi dhe Shëndetësia”, me 1.68 pikë përqindje. Pas tij renditen aktivitetet e pasurive të paluajtshme me 0.52 pikë përqindje, aktivitetet profesionale dhe shërbimet administrative me 0.47 pikë përqindje, ndërtimi me 0.32 pikë përqindje, si dhe tregtia, transporti, akomodimi dhe shërbimi ushqimor me 0.21 pikë përqindje.

Edhe aktivitetet financiare dhe të sigurimit, si dhe sektori i informacionit dhe komunikacionit, dhanë një kontribut pozitiv në rritjen ekonomike. Ndërkohë, taksat neto mbi produktet shtuan 0.74 pikë përqindje në zgjerimin e ekonomisë.