Ristrukturim me ‘gradat’ e vjetra, drejtuesit e rinj, prej vitesh pozicione kyçe në Policinë e Shtetit

Nëntë qarqe tashmë kanë një drejtor të ri policie, por emrat e rinj prej vitesh kanë mbajtur role kyçe në policinë e shtetit.

Ardian Çipa, i cili do të jetë tashmë në krye të policisë së Korçës, është një emër i promovuar që në vitin 2013 në krye të Policisë së Tiranës për të vijuar më tej si zv.drejtor për Krimet në Policinë e Shtetit e më pas si drejtor i Mbrojtjes së Dëshmitarëve të Drejtësisë.

Edhe Gjovalin Loka, që tashmë do drejtojë Policinë e Elbasanit, një qark problematik sa i takon kriminalitetit, ka mbajtur detyra të rëndësishme si drejtor i Rendit Publik, drejtor i Policisë së Shkodrës dhe drejtor i Departamentit të Sigurisë Publike.

Gjatë 8 viteve të fundit Neritan Nallbati ka drejtuar policinë në 3 qarqe dhe Drejtorinë e Standardeve Profesionale dhe tashmë emërohet në krye të departamentit të sigurisë.

Edhe Niko Brahimaj, deri tani drejtor i Policisë së Shkodrës, e më parë i Policisë së Lezhës dhe Forcave Lëvizëse Operacionale, do të vijojë detyrën në krye të Institutit të Policisë Shkencore.

Nga 12 lëvizjet në nivel drejtues bie në sy fakti se vetëm Skënder Hitaj, Hamdi Fjore, Luigj Vathi dhe Ardian Çipa kanë kaluar vetingun, ndërsa pjesa tjetër janë në pritje të rivlerësimit kalimtar.

LEXONI GJITHASHTU:

• Ndryshimet në Policinë e Shtetit, emrat e drejtuesve të rinj në qarqe
• Ministri Çuçi paralajmëron ndryshime rrënjësore në polici: Disa gjyqtarë po nxjerrin kriminelë nga burgu