Policia harton plan masash për mbarëvajtjen e sezonit turistik

Policia e Shtetit ka marrë plan masash për të garantuar siguri për pushuesit gjatë sezonit turistik duke nisur nga rritja e sigurisë në rrugë.

Policia thotë se ka firmosur marrëveshje bashkëpunimi me Kosovën dhe Malin e Zi për të shtuar patrullat e kontrollit në ato akse, ku fluksi i lëvizjeve është i lartë.

Baret dhe restorantet në bregdet do të duhet të respektojnë oraret për ushtrimin e aktivitetit sa i takon masave kundër COVID-19.

Sipas Policisë, subjektet në fjalë do të duhet të punojnë deri në orën 00:00, kurse muzika pas orës 22:00 të mbrëmjes nuk do lejohet.

Zonat bregdetare do të monitorohen për përdorimin e skafeve apo të motorëve të ujit pasi shpeshherë për shkak të keqpërdorimit të tyre janë shënuar aksidente fatale.

Zv.drejtori i Policisë së Shtetit, Albert Dervishaj u kërkoi drejtuesve të automjeteve të tregohen të kujdesshëm dhe të lëvizin brenda normave të lejuara.

Deri tani siç raporton Policia janë hequr rreth 5,955 mijë shezlongë e 2,445 çadra të vendosura në mënyrë të paligjshme në bregdet.

Në pesë muajt e parë të vitit 2021 është vënë re një rritje e ndjeshme e numrit të aksidenteve rrugore.

Sipas të dhënave zyrtare të INSTAT, në muajin maj 2021 numërohen 120 aksidente rrugore, nga 75 aksidente 2020, duke u rritur me 60% krahasuar me të njëjtën periudhë të vitit të kaluar.

LEXO GJITHASHTU: 

• Aksion policor në bregdetet e vendit për lirimin e hapësirave të zaptuara në mënyrë të paligjshme
• 4 të vrarë e 2 të plagosur pas një përplasje me armë në Velipojë
• Ekspertja e cilëson antireklamë për turizmin aksionin e qeverisë për të liruar plazhet në mes të sezonit