Kulla Eiffel rihapet pas mbylljes më të gjatë që prej Luftës së Dytë Botërore

Kulla Eiffel ka hapur sërish dyert për vizitorët, pas periudhës më të gjatë që qëndroi mbyllur, që prej Luftës së Dytë Botërore.

Pika më e famshme në kryeqytetin francez ka qëndruar e mbyllur prej nëntë muajsh, për shkak të kufizimeve të COVID-19, mirëpo nga sot do të jetë sërish e hapur për vizitorët.

Kulla e njohur ndryshe si “Dama e Hekurt” nuk do t’i kthehet aktivitetit të plotë si më përpara, pasi do të presë deri në 13,000 vizitorë në ditë (gjysma e kapacitetit të zakonshëm), në mënyrë që të mund të ruhet distanca e duhur mes tyre.

Në mënyrë që të kenë akses në Kullën Eiffel, vizitorët duhet të kenë me vete një dëshmi të vaksinimit ose të testit negativ të COVID-19, kështu njoftoi qeveria franceze.

Pritet që gjysma e vizitorëve të jenë francezë, ndërsa turistët italianë dhe spanjollë do të jenë më të shumtë se zakonisht në numër.

Nga rezervimet e biletave që janë bërë deri tani pritet të ketë një “mungesë pothuajse totale” të turistëve britanikë, ndërsa 15% e vizitorëve pritet të jenë amerikanë. Numri i turistëve që kanë rezervuar nga Azia është shumë i ulët.

LEXONI GJITHASHTU:

• Iluzion optik në Paris, artisti i njohur krijon një humnerë poshtë kullës Eiffel
• Shtim i rasteve me variantin Delta në Francë, Presidenti Macron pritet të njoftojë masa të reja kufizuese