“Gjysma e fshatit është zhdukur”, qytetarët gjermanë rrëfejnë për përmbytjet

Gjermania është duke përjetuar një situatë të vështirë për shkak të reshjeve të dendura të shiut të cilat kanë shkatërruar rrugë dhe fshatra të tërë. Numri i viktimave rritet orë pas ore, ndërsa me mijëra persona vijojnë të rezultojnë të zhdukur.

Banorët në Schuld një nga zonat më të goditura rrëfejnë se gjithçka ndodhi shpejt dhe nuk kishin mundësi të ndihmonin fqinjët e tyre të cilët qëndronin në dritare në pritje për t’u shpëtuar.

“Gjysma e fshatit është zhdukur. Thjesht çdo gjë ndodhi kaq shpejt. Ne nuk mund të siguronim asgjë. Unë kurrë nuk kam parë diçka të tillë”, tha Frank Thel, një banor i zonës.

“Fuqia e ujit ishte e madhe sa më hodhi tutje” u shpreh një tjetër banor.

Ekspertët e emergjencave civile shprehen se çdo gjë është shkatërruar, çka vështirëson edhe kalimin. Por fatmirësisht kanë ndjerë mbështetje për të përballuar këtë situatë..

“Këtu në Schuld pyetja sot është: Çfarë do të pastrohet këtu tani? A mund të restaurojmë rrugët? Urat janë shembur, duke i bërë zonat të vështira për t’u arritur. Kemi ndjerë një solidaritet të jashtëzakonshëm. Ne krijuam një strehë emergjente por nuk ishte e nevojshme të përdorej, përveç nga punonjësit e urgjencës. Të gjithë të tjerët janë akomoduar në hotele dhe bujtina në rajon. Këtu furnizohemi me ushqim, i cili më pas shpërndahet”, tha Andreas Aolheid nga Shoqata e Zjarrfikësve.

Edhe në Belgjikë ku për shkak të motit të keq janë regjistruar viktima, kanë nisur të ndërtohen kampe për të ndihmuar qytetarët të cilët kanë mbetur të pastrehë. Franca, Italia dhe Austria kanë shprehur solidaritet për fqinjët e tyre, duke dërguar forcat e emergjencave.

Ndryshimet klimatike janë cilësuar fajtori kryesor për këtë situatë meteorologjike. Presidenti gjerman Steinmeier, në një dalje për mediat u shpreh se duhen marrë masa ndaj ndryshimeve klimatike në mënyrë që të shmanget moti ekstrem në të ardhmen e afërt.

LEXONI GJITHASHTU:

• 90 viktima dhe mbi 1000 të zhdukur nga përmbytjet në Gjermani
• Shirat e dendur shkaktojnë përmbytje, të paktën tetë të vdekur në Gjermani dhe Belgjikë
• Përmbytjet në Europë, Ministria e Jashtme njofton se nuk ka shqiptarë të prekur