Balla komenton arrestimet e fundit: PS nuk mund të bëhet pis nga asnjë individ

Kreu i Grupit Parlamentar të Partisë Socialiste, Taulant Balla deklaroi se selia rozë nuk mban përgjegjësi për personat që kanë probleme me drejtësinë.

“PS nuk mund të bëhet pis nga asnjë individ, që në një moment të caktuar ka marrë një mandat përfaqësimi nga Partia Socialiste, përgjegjësia është vetëm personale”, tha z. Balla.

Për këtë, numri dy i socialistëve tha se betejën duhet ta vazhdojnë të vetëm.

“Tushe nuk është më pjesë e Partisë Socialiste, ka detyrimin të bëjë betejën ligjore, sepse këtë standard ne e kemi vendosur prej shumë kohësh dhe Partia Socialiste e Shqipërisë nuk mban asnjë përgjegjësi për të apo çdo person, i cili këtë betejë dhe këtë hesap e ka personal me drejtësinë”, shtoi Balla.

Kryetari i Bashkisë së Lushnjës, Fatos Tushe u vu në prangat e policisë pak ditë më parë, pasi akuzohet për “shpërdorim detyre në bashkëpunim”. Ai u arrestua bashkë me nëntë zyrtarë të tjerë me urdhër të SPAK.