Financimi i partive, Celibashi: Ato që nuk paguajnë gjobën, s’do futen në zgjedhje

106 partitë që u gjobitën nga KQZ për mosraportimin e të ardhurave dhe shpenzimeve për vitin 2020, rrezikojnë pjesëmarrjen në zgjedhjet e ardhshme.

Komisioneri i Zgjedhjeve, Ilirjan Celibashi gjatë intervistës për Euronews Albania, tha se bllokimi mund t’u bëhet në rast se ato nuk i paguajnë gjobat e vëna.

“Një pjesë e këtyre partive nuk kanë as adresë dhe asgjë. Nëse nuk i paguajnë sanksionet, nuk do të marrin pjesë në zgjedhje. Por, ngelet për t’u parë se çfarë do të vendosë KAS dhe Kolegji Zgjedhor”, u shpreh z. Celibashi.

Celibashi komentoi edhe çështjen e financimeve dhe shpenzimeve reale që partitë bëjnë gjatë fushatës, përtej atyre që deklarojnë.

“Do ngelet e vështirë për ta bërë këtë gjë siç duhet bërë. Kjo vlen njësoj sikur të pyesësh tatimet për bizneset se sa të përputhura janë ato që deklarojnë me xhirot reale. Kur vjen puna te partitë, kjo bëhet edhe më e vështirë”, tha ai.

Gjithashtu, Komisioneri Shtetëror i Zgjedhjeve foli për votën e emigrantëve, duke siguruar se në procesin e ardhshëm zgjedhor janë të gjitha mundësitë që emigrantët t’u mundësohet votimi nga vendet ku jetojnë.

“Në shtator KQZ do të ketë në fokus përgatitjen e infrastrukturës ligjore dhe teknike për votën e emigrantëve. Nga sot dhe deri ditën e zgjedhjeve, kemi gjithë kohën e mjaftueshme në dispozicion për ta përgatitur këtë proces dhe nuk mund të ketë më justifikime për këtë”, shtoi z. Celibashi.

Sa i përket rekomandimeve në raportin final të OSBE/ODIHR, Ilirjan Celibashi theksoi se përtej vlerësimit pozitiv për KQZ, nga shtatori do të nisë puna për përmirësimet e kërkuara.

LEXONI GJITHASHTU:

• Një votë e 25 prillit kushton 85 lekë, katër partitë që do përfitojnë nga buxheti i shtetit
• KQZ gjobit 106 parti që nuk dorëzuan raportet financiare për vitin 2020