Kurti: Prej një muaji në kontakt me SHBA-në për të strehuar afganët

Kryeministri Albin Kurti ka deklaruar para mediave se qeveria e Kosovës ka një muaj që është në komunikim të vazhdueshëm me Shtetet e Bashkuara të Amerikës për strehimin e afganëve, sa i përket aspektit organizativ, logjistik, teknik por edhe të sigurisë.

Kurti nënvizoi se strehimi i afganëve përveç aspektit të solidaritetit është edhe dimension i aleancës dhe partneritetit me Shtetet e Bashkuara të Amerikës.

“Ne jemi shtet serioz dhe tani e një muaj këtë punë e kemi bërë pa zhurmë dhe me shumë kujdes meqenëse çështja e refugjatëve nga Afganistani është jo vetëm një çështje e dhimbshme njerëzore, por edhe një çështje e ndjeshme e sigurisë”, ka thënë Kurti.

Ai shtoi se detajet për strehimin dhe mbrojtjen e refugjatëve nga Afganistani janë duke u diskutuar me Shtetet e Bashkuara të Amerikës dhe  se shifrat, kohëzgjatja dhe vendi i strehimit do të bëhen të ditura në vijim.

Përveç Kosovës, pranimin e afganëve deri më tani e kanë konfirmuar Shqipëria, Maqedonia e Veriut dhe Kanadaja.

Sot në Shqipëri pritet të mbërrijnë rreth 300 afganë, të cilët janë bashkëpunëtorë të SHBA dhe forcave të aleancës së NATO-s.

Atyre u rrezikohet jeta në Afganistan, pasi vendi kontrollohet nga talebanët.

LEXONI GJITHASHTU:

• Rreth 300 afganë pritet të mbërrijë në Shqipëri brenda 24 orëve, mëson Euronews Albania
• Një pjesë e afganëve do të strehohen në konviktet e “Qytetit Studenti”
• Rreth 250 afganë pritet të mbërrijnë në Shqipëri brenda kësaj jave