“Policia i ka duart me gjak”, protestuesit në Ferizaj spërkasin vendin me ngjyrë të kuqe

Vrasja e një 18-vjeçareje të dielën në Ferizaj ka nxitur protesta ditën e sotme.

Protestuesit para rajonit policor në Ferizaj bënë thirrje për dënimin e autorëve të dyshuar dhe mbrojtje të jetës së grave.

Përveç thirrjeve dhe pankartave, protestuesit hodhën ngjyrë të kuqe në drejtim të policëve, akt ky i shoqëruar me simbolikën që “policia i ka duart me gjak”.

“Dënim maksimal për Arbër Sejdiun”, “Dënim maksimal për Dardan Krivaqën”, “Poshtë institucionet patriarkale”, Jeta e grave hajgare për policinë”, ishin disa nga thirrjet e protestuesve.

Brenda një dite 6 gra u sulmuan fizikisht nga bashkëshortët e tyre, në Kosovë.

Edhe ditën e djeshme disa organizata në Kosovë kanë protestuar për mbrojtjen e jetës së grave, duke kërkuar nga drejtësia që të merret me rastin e 18-vjeçares në mënyrë emergjente.

Dy persona janë arrestuar për vrasjen e 18-vjeçares M.O., Arbër Sejdiu dhe Dardan Krivaqa, ku ky i fundit bashkëjetonte me viktimën dhe ka qenë edhe më parë i dyshuar për disa raste vrasjesh.

Trupit të 18-vjeçares po i kryhet autopsia, ndërsa policia vijon hetimet për zbardhjen e plotë të ngjarjes.

LEXONI GJITHASHTU:

• Arrestohet i riu që dyshohet se vrau 18-vjeçaren në Kosovë
• 18-vjeçarja dërgohet e pajetë në spitalin e Ferizajt, arrestohet një person