Rama për zhvillimet në PD: Duhet të kemi durim e respekt për traumat e të tjerëve

Pas votimit të kryetares së Kuvendit, kryeministri Edi Rama tha se fokusi i PS-së në mandatin e tretë është pastrimi i Shqipërisë.

Para gazetarëve, z. Rama paralajmëroi një vendim, përmes të cilit siç tha ai do ndalohet përdorimi individual i qeseve plastike.

“Ky mandat do jetë mandat i rëndësishëm në përpjekjen për të pastruar Shqipërinë. Së shpejti do të marrin një vendim për ndalimin e qeseve plastike për përdorim individual”, tha Rama, teksa u përpoq të shpjegonte aktin e tij teksa mblodhi në një qese fletët e grisura nga deputetë e Partisë Demokratike në seancën e pasdites.

Ai u pyet për betimin para Presidentit Meta, të cilin këtë të fundit mazhoranca socialiste e shkarkoi me pretendimin se kreu i shtetit kishte shkelur kushtetutën.

Kryeministri tha se pavarësisht kësaj, ai do të paraqitet para Metës për të marrë betimin për mandatin e tretë, kurse vendimi për shkarkimin e tij ose jo i takon Gjykatës Kushtetuese.

“Ka një dallim të qartë për të gjithë, që është dallimi mes qëndrimeve politike dhe distancimeve të natyrës politike dhe kornizës kushtetuese. Për sa kohë Meta është në zyrë dhe në pritje për t’u gjykuar nga Gjykata, ai mbetet në detyrë dhe nuk varet kjo nga dëshira jonë. Ne e kemi shkarkuar, por kjo është një republikë kushtetuese, që ka dy hallka”, tha ai.

Një tjetër çështje që u komentua nga Rama jashtë Kuvendit ishte përjashtimi i z. Berisha nga grupi parlamentar i Partisë Demokratike, ndërsa tha se:

“Nuk kam dëgjuar asgjë, përveç tam-tameve, që janë të mirëkuptueshme në një ditë si kjo që nuk është një ditë e lehtë për PD dhe është një proces traumatik, kështu që duhet të kemi durim dhe respekt për traumat e të tjerëve”, tha ai.

LEXONI GJITHASHTU: 

• ‘Ndoqa me dhimbje reagimin e Berishës’, Basha u përgjigjet akuzave të ish-kryeministrit