A do publikojë SHBA videon e plotë të sulmeve në Karaibe? Përgjigjet Hegseth

Sekretari amerikan i Mbrojtjes, Pete Hegseth, deklaroi të martën se nuk ka plane për publikimin e videos së plotë dhe të pamontuar të sulmeve të 2 shtatorit ndaj një anijeje të dyshuar për trafik droge në Karaibe, sulme që kanë ngritur shqetësime mbi planet e administratës Trump ndaj Venezuelës.

Hegseth, së bashku me Sekretarin e Shtetit Marco Rubio, zhvilluan takime informuese me çdo anëtar të Senatit, pas kërkesave të ligjvënësve për më shumë informacion mbi një fushatë 3-mujore e gjysmë, e cila përfshiu mbi 20 sulme ndaj anijeve në Karaibe dhe Paqësor, duke shkaktuar mbi 80 viktima. Vetëm të hënën, ushtria amerikane goditi tre anije në Paqësor, duke vrarë tetë persona.

“Në përputhje me politikën e kahershme të Departamentit të Luftës dhe të Departamentit të Mbrojtjes, nuk do të publikojmë një video të plotë dhe të pamontuar për publikun e gjerë”, tha Hegseth në Capitol Hill.

Dy sekretarët mbajtën gjithashtu një takim informues të ngjashëm edhe me anëtarët e Dhomës së Përfaqësuesve. Shqetësimet mbi operacionin u shtuan pasi u bë e ditur se komandanti përgjegjës kishte urdhëruar një sulm të dytë më 2 shtator, i cili vrau dy të mbijetuar.

Presidenti amerikan Donald Trump fillimisht ishte shprehur i hapur për publikimin e videos, por më pas ia la vendimin përfundimtar Sekretarit të Mbrojtjes.