A do zgjidhen mosmarrëveshjet Kosovë-Serbi në samitin në Tiranë? Flet Edi Rama

Kryeministri Edi Rama e konsideron një çështje të vështirë Kosovën dhe Serbinë, në lidhje me mosmarrëveshjet që të dyja vendet kanë.

Në një deklaratë për mediat pas pritjes së 27 delegacioneve evropiane, Rama u shpreh se do të donte që mosmarrëveshjet të zgjidheshin në samitin e sotëm.

“Do uroja që po. Do uroja që Bashkimi Evropian që të ketë këtë lloj magjie. Por nuk është  rasti. Është e vështirë si çështje, do kohën e vet, por më lejoni të them që Ballkani Perëndimor nuk ka qenë më mirë historikisht.

Sidomos shqiptarët, si në Shqipëri, Kosovë, dhe në vende të tjera, nuk kanë qenë në pozicion më të mirë historik se sa tani”, theksoi ai.

Krahas samitit, do të zhvillohet një protestë, e thirrur nga Partia Demokratike. Kreu i kësaj force politike, Sali Berisha ka thënë se protesta do të mbahet në orën 12:00 para Kryeministrisë.

Edhe pse policia nuk ka dhënë leje për protestën brenda perimetrit të sigurisë, Berisha ka deklaruar se populli opozitar do të mbushë rrugët dhe sheshet e Tiranës.

LEXONI GJITHASHTU

• ‘Historike’, Rama: Askush nuk e imagjinonte që samiti do mbahej në Tiranë
• ‘I lumtur që jam në Shqipëri’, Macron: Solidaritet për integrimin e Ballkanit
• ‘Siguria e Evropës është sfiduar nga Rusia”, Marin: Çfarë do diskutojmë në samit