“A kanë bllokuar 9 vende integrimin e Shqipërisë në BE?”, Rama përgjigjet nga Durrësi

Kryeministri Edi Rama ka komentuar këtë të enjte nga Durrësi në takim me Asamblenë e PS-së së qytetit, lajmet mbi bllokimin e integrimit të Shqipërisë nga 9 vende anëtare të BE-së.
Rama tha se sipas tij aludimi se kanë bllokuar Shqipërinë në procesin e integrimit është një “barsoletë”.

“Po shohim këtë çështjen e anëtarësimit nga të dyja anët. Procesi ka njërën anë që lidhet me, një anë që lidhet me ta. BE-ja është si kjo këtu me dy kate, që në katin e parë janë mijëra punonjës që merren me të gjitha aspektet e BE-së, një pjesë e atij katit të parë merret me ndjekjen e procesit për vendet që duan të anëtarësohen. Në mënyrën se si plotësojmë detyrat, ata dërgojnë letrën në katin e dytë. Ata në kat të dytë nuk shohin si ata të katit të parë detajet.

Kati i parë si shkollë, i dyti si marrje në punë. Një mjafton të thotë jo në katin e dytë, nuk bëhet, 27 shtete duhet të jenë në një mendje. Të gjitha këto reforma e procese e bëjnë Shqipërinë shtet, prandaj janë një ushtrim jashtëzakonisht i dobishëm për ne. Bëhet Shqipëria si një vend i BE. Ne duhet të jemi gati. Kjo e 9 shteteve është barsoletë komplet. Barsoletë që 9 shtete kanë vënë veton, veton e vë njëri, po qe 9 nuk është më veto. Nuk ka fare”, tha Rama.