A pritet që deputetë të tjerë të lënë mandatet?

Deputetët që lanë mandatin pas zgjedhjeve të 25 prillit ishin:
• Alfred Rushaj
• Mark Marku
• Grida Duma
Gazetarja e Euronews Albania, Raziela Myslimaj tha se pritet të ketë të tjera lënie mandatesh, por nuk dihet nëse do jenë për shkak të krizës që po kalon aktualisht Partia Demokratike apo për shkak të zgjedhjeve lokale që po vijnë.
Nëse deputeti Belind Këlliçi fiton primaret në garën për Tiranën duke u bërë kështu zyrtarisht kandidati i opozitës për zgjedhjet vendore të 14 majit, siç ka pohuar edhe ai vetë do të dorëzojë mandatin e deputetit.
E njëjta gjë vlen edhe për deputetin Zef Hila i cili ka zyrtarizuar kandidaturën e tij për primaret në Vaun e Dejës duke aspiruar postin e kryebashkiakut të cilin e ka mbajtur edhe më parë.
Ndonëse ende nuk është zyrtarizuar, në garën e Elbasanit deputeti Luciano Boçi përflitet si një kandidat potencial, e nëse do të konfirmohet si fitues në primare atëherë edhe Boçi duhet të lërë mandatin, duke i hapur rrugë kështu deputetit tjetër më të votuar në Elbasan në zgjedhjet e 25 prillit.

Myslimaj tregoi më tej se në momentin që Alfred Rushaj do të zyrtarizojë lënien e mandatit të tij pritet të zëvendësohet nga Petrit Doda, i cili në listën e Tiranës u rëndit në vendin e 32-të.

Nëse Doda nuk e pranon mandatin, pasi situata në PD është shumë e tensionuar i treti në radhë është Asllan Dogjani.
Mark Marku u zëvendësua nga deputetja më e re në qarkun e Lezhës, Elda Hoti, e cila u rendit e nënta.
Ndërkohë Grida Duma e cila e la sot mandatin pritet të zëvendësohet nga Ori Nebiaj, e cila u rendit e 18-ta në listën e Tiranës.
Në rast se Nebiaj nuk e pranon mandatin për shkak edhe të angazhimeve në televizion, atëherë posti i kalon Lediana Fratarit.

LEXONI GJITHASHTU:

• Partia Demokratike shkon e përçarë në zgjedhjet vendore të 14 majit
• Partia Demokratike kërkon të marrë pushtetin me dhunë, thotë Rama
• Partia Demokratike është e pashpresë dhe nuk ka moral, thotë ish-presidenti Topi