Agjencia bërthamore e OKB: Irani s’po përmbush detyrimet për herë të parë në 20 vjet

Bordi drejtues i Agjencisë Ndërkombëtare të Energjisë Atomike (IAEA) ka konstatuar zyrtarisht se Irani nuk i përmbush detyrimet e tij bërthamore për herë të parë në 20 vjet, gjë që mund të hapë rrugën për rivendosjen e sanksioneve të Kombeve të Bashkuara ndaj Teheranit më vonë këtë vit.

Irani reagoi menjëherë ndaj këtij vendimi duke njoftuar se do të krijojë një strukturë të re për pasurimin e uraniumit, e cila, siç u njoftua, do të jetë “në një vend të sigurt”, shkruan Euronews.

“Republika Islamike e Iranit nuk ka zgjidhje tjetër veçse t’i përgjigjet kësaj rezolute politike”, thanë në një deklaratë të përbashkët Ministria e Jashtme iraniane dhe Organizata e Energjisë Atomike e Iranit.

Sipas diplomatëve që folën në kushte anonimiteti, 19 vende anëtare të Bordit Drejtues të IAEA-së votuan për të miratuar rezolutën. Rusia, Kina dhe Burkina Faso ishin kundër, ndërsa 11 vende abstenuan dhe dy nuk votuan.

Në projekt-rezolutën, komiteti i bën përsëri thirrje Iranit të japë përgjigje “pa vonesë” brenda kuadrit të hetimit shumëvjeçar mbi gjurmët e uraniumit të gjetura në disa vende që Teherani nuk i ka deklaruar si objekte bërthamore.

Vendet perëndimore dyshojnë se gjurmët e uraniumit tregojnë ekzistencën e një programi sekret iranian të zhvillimit të armëve bërthamore deri në vitin 2003.

Rezoluta u propozua nga Franca, Gjermania, Britania e Madhe dhe Shtetet e Bashkuara të Amerikës.

Vendimi vjen në një kohë tensionesh të larta në rajon. Një ditë më parë, Departamenti Amerikan i Shtetit njoftoi se po tërhiqte një pjesë të personelit thelbësor nga Lindja e Mesme për shkak të situatës së sigurisë.

Presidenti i SHBA-së, Donald Trump, tha më parë se Uashingtoni ose Izraeli mund të kryejnë sulme ajrore ndaj objekteve bërthamore të Iranit nëse negociatat dështojnë.

SHBA-të dhe Irani po negociojnë aktualisht mbi programin bërthamor të Teheranit që po përparon me shpejtësi. Ministri i Punëve të Jashtme i Omanit tha se raundi i gjashtë i negociatave do të mbahet të dielën në vendin e tij.

Projektrezoluta e IAEA-s përmban gjithashtu një referencë të drejtpërdrejtë për negociatat SHBA-Iran, duke theksuar “mbështetjen për një zgjidhje diplomatike të problemeve të shkaktuara nga programi bërthamor i Iranit, duke përfshirë bisedimet midis Shteteve të Bashkuara të Amerikës dhe Iranit, me qëllim arritjen e një marrëveshjeje që do të zgjidhte të gjitha çështjet ndërkombëtare që lidhen me aktivitetet bërthamore të Iranit, dhe inkurajon të gjitha palët të marrin pjesë në mënyrë konstruktive në dialog”.

LEXONI GJITHASHTU:

• Raundi i gjashtë i bisedimeve midis SHBA-së dhe Iranit do të mbahet në Oman
• SHBA do evakuojë pjesërisht ambasadën në Irak, shkak rritja e tensioneve me Iranin