Agjencia për Dialog e Bashkëqeverisje miratohet në komisionin e ligjeve pa votat e opozitës

Vetëm me votat e mazhorancës u miratua në parim në komisionin e ligjeve projektligji për ngritjen e Agjencisë për Dialog dhe Bashkëqeverisje. Por pavarësisht votës pro, deputeti socialist Fatmir Xhafaj shfaqi rezerva për nismën e sjellë nga qeveria.

“Ligji, nga sa e lexoj unë nuk e ka qartësinë e nevojshme, madje e komplikon në disa raste raportin administratë-qytetar. Projektligji në thelb ka një qëllim shumë të mirë dhe duhet mbështetur, por ligji vetë, përmbajtja e tij është i shkruar keq”, tha deputeti socialist.

Qeveria kërkon që t’i japë agjencisë formën e ligjit, ndërsa opozita e kundërshtoi.

“Unë mendoj se një ligj që nuk i shërben interesit të qytetarëve, një ligj që thjesht i shërben propagandës së kryeministrit që të ketë mundësi të zërë kohën 1 herë në javë 2 orë në televizor, që të bëjë sikur të punojë se ndërkohë s’ka ndërmend të punojë, nuk mund të marrë kurrë votën e çdo deputeti që është këtu, për atë që është këtu për të përfaqësuar interesin e qytetarëve”, tha deputeti demokrat Gazmend Bardhi.

Ministrja e shtetit për Marrëdhëniet me Parlamentin, Elisa Spiropali e konsideroi agjencinë një mekanizëm demokratik në duart e qytetarëve.

Nuk është modeli venezeulian, por është modeli grek dhe bullgar”, tha Spiropali.

Projektligj përcakton rregullat për bashkëqeverisjen me qytetarët nëpërmjet gjithëpërfshirjes së tyre në politikëbërje. Dokumenti parashikon edhe ndëshkimin e zyrtarëve që shkelin detyrën dhe nuk japin shërbimin e duhur për qytetarët.