Aksident apo e qëllmshme? Misteri i ndërprerjes së karburantit në avionin Air India

Një muaj pas rrëzimit tragjik të avionit Air India Boeing 787 Dreamliner në Ahmedabad, një raport paraprak nga Byroja e Hetimit të Aksidenteve Ajrore të Indisë, ka zbuluar detaje shqetësuese rreth ngjarjes, duke ngritur po ashtu edhe shumë pyetje.

Raporti tregon se dy çelësa për ndërprerjen e karburantit u zhvendosën nga pozicioni ‘funksional’ në ‘ndërprerës’ disa sekonda pas ngritjes së avionit, duke privuar motorët nga karburanti dhe duke shkaktuar humbjen e shtytjes. Edhe pse motorët rifilluan punë më pas, ishte shumë vonë për të parandaluar aksidentin fatal.

Një moment kyç është dialogu mes pilotëve, ku njëri pyet: “Pse e ndërpreve?”, ndërsa tjetri mohon çdo veprim të tillë. Raporti nuk identifikon cili pilot foli, dhe nuk përfshin transkriptin e regjistruesit të zërit në kabinë, një element kyç për zbardhjen e saktë të ngjarjes.

Raporti përmend gjithashtu një buletin sigurie të Administratës Federale të Aviacionit të SHBA-së nga viti 2018, që paralajmëron për një problem me kyçjen e çelësave të ndërprerjes së karburantit në modelet Boeing 737, duke rritur mundësinë e çaktivizimit aksidental të tyre.

Këto të dhëna kanë nxitur spekulime dhe akuza për një veprim të qëllimshëm nga një pilot, por Shoqata Indiane e Pilotëve Tregtarë ka kundërshtuar ashpër këto pretendime, duke i cilësuar si të papërgjegjshme dhe ofenduese ndaj familjeve të viktimave.

Ish-hetuesi i aksidenteve ajrore Tim Atkinson ka cilësuar raportin si “zhgënjyes”, duke kritikuar mungesën e qartësisë dhe transparencës.

Në përgjigje të situatës, Drejtoria e Aviacionit Civil të Indisë ka urdhëruar inspektime të detajuara për të gjitha avionët e kategorisë së ngjashme, me afat deri më 21 korrik.

Raporti përfundimtar pritet të publikohet brenda një viti, por deri atëherë shumë pyetje mbeten pa përgjigje për fatin tragjik të Fluturimit 171 të Air India.

LEXONI GJITHASHTU:

• Publikohet raporti: Çfarë e shkaktoi rrëzimin e avionit ku vdiqën 260 persona
• U rrëzua 5 minuta pas nisjes, momenti kur avioni me 244 pasagjerë shpërthen në flakë
• Çfarë e shkaktoi rrëzimin e avionit me 242 persona në bord, dyshimet e ekspertëve