Aksident i rëndë në aksin Lezhë-Milot, një person mbetet i bllokuar në automjet

Një aksident i rëndë ka ndodhur paraditen e kësaj të hëne në aksin rrugor Lezhë-Milot. Sipas informacioneve paraprake një automjet tip “Volkswagen”, me të cilin udhëtonin 4 persona u përplas me një kamion.

Si pasojë e aksidentit u plagosën rëndë 4 personat në autoveturë, njëri prej të cilëve mbeti i bllokuar për disa minuta në automjet.

U desh ndërhyrja e zjarrfikësve për të bërë të mundur nxjerrjen e personit.

Përmes një komunikate zyrtare policia bën me dije se rrugës për në spital ka ndërruar jetë një nga të plagosurit, shtetasi 80-vjeçar me inicialet, I. D.

Ndërkohë që 3 të lënduarit e tjerë janë dërguar me urgjencë në spital ku po marrin kujdesin e nevojshëm mjekësor.

Grupi hetimor dhe policia ndodhen në vendngjarje ku po punojnë për zbardhjen e rrethanave të aksidentit.

Lezhë/Informacion paraprak

Rreth orës 12:30, në aksin rrugor “Lezhë-Milot”, janë përplasur automjeti tip “Volkswagen”, me drejtues shtetasin Z. C., rreth 70 vjeç, me kamionin me drejtues shtetasin K. J.

Nga përplasja janë dëmtuar shtetasi Z. C. dhe 3 pasagjerët në automjetin që drejtonte ai. Njëri nga pasagjerët, shtetasi I. D., 80 vjeç, ka humbur jetën gjatë transportimit në spital, ndërsa 3 të dëmtuarit e tjerë janë në kujdesin e mjekëve.

Grupi i posaçëm hetimor po punon në vendngjarje për të zbardhur rrethanat e aksidentit.

• Aksident në Berat/ Përplaset nga makina një 85-vjeçar, dërgohet menjëherë në spital
• Aksident në Fier, automjeti del nga rruga, plagoset shoferi