Aksident me vdekje në rrugë Delvinë-Kardhiq, makina përplas 72-vjeçarin

Një aksident me pasojë vdekjen e një personi është shënuar mëngjesin e së dielës në rrugën Delvinë-Kardhiq.

Aksidenti ka ndodhur pranë fshatit Fushë Vërri. Një automjet ka përplasur një banor, i cili po ecte në rrugë së bashku me një lopë dhe një gomar.

Si pasojë e goditjes, banori ka humbur jetën në vend, ndërsa edhe të dy kafshët kanë ngordhur nga përplasja.

Përmes një njoftimi zyrtar policia bëri me dije se shtetasi E. O., 63 vjeç, dyshohet se ka humbur kontrollin mbi drejtimin e automjetit tip “Benz” dhe ka aksidentuar këmbësorin, shtetasin Luan Xhuvani, 72 vjeç, e më pas, është përplasur me një tjetër automjet tip “Benz”, me drejtues shtetasin V. G.

Si pasojë e aksidentit, shtetasi Xhuvani ka ndërruar jetë gjatë transportit për në spitalin e Sarandës.

Drejtuesi i automjetit, shtetasi E. O., u shoqërua në komisariat për veprime të mëtejshme.

Grupi hetimor vijon veprimet për zbardhjen e plotë të rrethanave të aksidentit.

LEXONI GJITHASHTU:

• Aksident| Makina përplas automjetin e parkuar e futet në lokal, plagoset një person
• Aksident në Korçë, makina përplas për vdekje këmbësorin