Aksidenti me 8 viktima në Këlcyrë, Eksperti: Duhet analizuar shpejtësia dhe rruga

Eksperti i Sigurisë Rrugore, Islam Qibini, në një lidhje për emisionin “Good Morning Albanians” në Euronews, ka analizuar aksidentin me 8 viktima në aksin “Këlcyrë-Përmet”.

Qibini tha se sipas të dhënave paraprake, aksidenti ka ndodhur për shkak të shpejtësisë së lartë të drejtimit të mjetit dhe kushteve të rrugës.

Ai tha se rruga ku ka ndodhur aksidenti është një rrugë lokale, ku ka mungesa të theksuara të sinjalistikës.

Kujtojmë se në aksidentin në fjalë, 7 prej viktimave ishin shtetas nga vendet e treta dhe shoferi ishte nga Shkodra.

“Është një rrugë dytësore. Është një aks që kërkon që drejtuesit të kenë aftësi profesionale në drejtimin e mjetit. Patjetër që ka qenë mbi limitet e lejuara të shpejtësisë. Duke qenë në ndjekje të Policisë, ai ka rritur shpejtësinë. Ky segmet nuk është i pajisur me barriera metalike dhe me ndriçues për të treguar drejtimin e lëvizjes.

Në anësoren e rrugës, për të treguar trajektoren e lëvizjes, vendoset delinator, që janë disa centimetra mbi sipërfaqen e rrugës. Në rrugët lokale ka mungesë të theksuar të sinjalistikës vertikale dhe horizontale. Kjo është më tepër të terrenit, sipërfaqes së rrugës dhe kushteve të rrugës. Nëse kemi në sipërfaqen e rrugës dhe dhe zhavorr, atëherë zvogëlohet koeficienti i fërkimit mes gomave dhe rrugës”, tha Qibini.

LEXONI GJITHASHTU:

• 7 prej tyre emigrantë, shoferi nga Shkodra! Detaje mbi aksidentin me 8 viktima
• Fotot|Policia i bëri shenjë të ndalonin, si ndodhi aksidenti me 8 viktima në Këlcyrë