Aksidenti te vijat e bardha, familjari: Nëna u përmend sot dhe kërkoi foshnjën

Elvis Toçi, familjar i çiftit që u aksidentua të dielën në vijat e bardha në Tiranë, pasi u përplasen nga një makinë, ka folur për gjendjen e çiftit në emisionin “Sot” në Euronews Albania.

Ai tha se lajmin e mori vesh nga televizioni dhe u trondit.

“Nuk ka shqiptar që sheh një video ku kthehet karroca në mes të rrugës me foshnjën 3-muajshe”, u shpreh ai.

Prindërit dhe fëmija janë nën monitorim të mjekëve në spitalin ushtarak.

Toçi tregoi se nëna e fëmijës, Vilma ka pësuar goditje në kokë, ndërsa bashkëshorti, Ariani ka 7 brinjë të thyera si pasojë e aksidentit.

Nëna e fëmijës u përmend sot, pasi dje nuk reagonte, tha ai, dhe kërkoi të shikonte fëmijën.

“Ti sheh një familje që pas kaq kohësh u bënë prindër, dhe vjen dikush e iu pret sistemin më të bukur të jetën”, tha ai.

Foshnja ka qenë me gji të nënës por për shkak të aksidentit po ushqehet me mënyra alternative.

Të dielën te vijat e bardha në një rrugë të Tiranës, një makinë përplasi një çift bashkë me foshnjën e tyre 3-muajshe, të cilët janë jashtë rrezikut për jetën.

LEXONI GJITHASHTU:

• 3 akuzat, gjoba dhe penalizimet për autorin e aksidentit te vijat e bardha