Albanese mbledh kabinetin pas masakrës, propozon ligje më të ashpra për armët

Kryeministri australian Anthony Albanese propozoi të hënën ligje më të ashpra kombëtare për armët pas një të shtënë masive gjatë festimit të Hanukkah në plazhin Bondi të Sidneit, duke lënë të paktën 15 të vdekur.

Ai mblodhi me urgjencë kabinetin qeveritar, ndërsa u shpreh se do të propozonte kufizime të reja, duke përfshirë kufizimin e numrit të armëve që një pronar i licencuar mund të zotërojë.

Propozimet e tij u njoftuan pasi autoritetet zbuluan se më i madhi nga dy personat e armatosur – të cilët ishin baba dhe bir – kishte pasur një licencë armëmbajtjeje për një dekadë dhe i kishte grumbulluar gjashtë armët e tij ligjërisht.

“Qeveria është e përgatitur të ndërmarrë çdo veprim të nevojshëm. Këtu përfshihet edhe nevoja për ligje më të ashpra për armët”, u tha Albanese gazetarëve.

“Rrethanat e njerëzve mund të ndryshojnë. Njerëzit mund të radikalizohen me kalimin e kohës. Licencat nuk duhet të jenë të përjetshme”, shtoi ai.

Të paktën 38 persona po trajtoheshin në spitale pas masakrës së të dielës, kur dy persona të armatosur qëlluan mbi njerëzit që festonin pranë plazhit.

Mes të vrarëve ishin një vajzë 10-vjeçare, një rabin dhe një i mbijetuar i Holokaustit.

Tmerri në plazhin më të njohur të Australisë ishte të shtënat më vdekjeprurëse në pothuajse tre dekada, në një vend me ligje të rrepta të kontrollit të armëve që synojnë kryesisht heqjen nga qarkullimi të armëve me zjarr të shpejtë.

Albanese e quajti masakrën një akt terrorizmi antisemit që goditi në zemër të kombit.

Policia ka konfirmuar se po heton dy të dyshuar, baba e bir.

Babai vdiq në sulm. Djali ndodhet aktualisht në spital, por autoritetet thonë se ka të ngjarë që ai t’u mbijetojë plagëve të marra.

Komisioneri i Policisë së Uellsit të Ri Jugor, Mal Lanyon, e ka cilësuar incidentin si të lidhur me terrorizmin.

“Sot mblodha Kabinetin Kombëtar për t’iu përgjigjur aktit të terrorizmit dhe antisemitizmit në Bondi mbrëmë. Ne qëndrojmë me australianët hebrenj dhe kundër urrejtjes dhe dhunës. Australia është më e fortë se ata që përpiqen të na ndajnë dhe ne do ta kalojmë këtë së bashku”, shkruan Albanese në x.

Today I convened National Cabinet to respond to the act of terror and antisemitism in Bondi last night.

We stand with Jewish Australians and we stand against hatred and violence.

Australia is stronger than those who try to divide us and we will come through this together. pic.twitter.com/LjdYO6CRYZ

— Anthony Albanese (@AlboMP) December 15, 2025

LEXONI GJITHASHTU: 

• Kush është “heroi” në tragjedinë e Australisë që neutralizoi një nga autorët
• Masakra në Sidney/ Izraeli akuzon Australinë për heshtje ndaj antisemitizmit