“Aleatët duan korrektësi”, Alibeaj: Qeveria do marrë haraçin për ndikim në zgjedhje

Kryetari i komanduar i Partisë Demokratike, Enkelejd Alibeaj tha në një intervistë për Euronews Albania se ka një vëmendje të përqendruar të partnerëve ndërkombëtarë për korrektësinë dhe rregullin e zgjedhjeve të 14 majit.

“Me të gjitha kërkesat që kanë bërë për çështje të pastërtisë së kandidatëve, të mos përfshirjes së administratës, mos përdorimit të të dhënave personale e me radhë, që tani që flasim bashkë, kam përshtypjen se nota për këto zgjedhje është jo kaluese dhe barra për to është për qeverinë. Besoj se do të marrin haraçin e tyre,” – u shpreh Alibeaj.

Sipas tij, mënyra e vetme për të dalë nga “regjimi i Edi Ramës” është oferta për një parti ndryshe.

“Si ishte Partia Demokratike e 32 viteve më parë? Ishte totalisht ndryshe nga këneta e Partisë së Punës dhe Partisë Komuniste dhe ishte ajo mënyrë e të shfaqurit me njerëz të qytetëruar, me njerëz që flasin e nuk bërtasin, që arsyetojnë e nuk shajnë, që distancohen nga hijet e korrupsionit dhe kjo është mënyra se si ti mund të krijosh besueshmërinë te të paktën 50% e elektoratit që refuzon secilin prej përfaqësuesve të vjetër të politikës,” – tha Alibeaj.

Kryetari i komanduar i PD-së shtoi gjithashtu dhe mbështetjen e partnerëve euro-atlantikë për të përkufizuar formën se si mendon që mund t’i kundërvihesh çfarëdolloj regjimi.

LEXONI GJITHASHTU:

• Takimi me Escobar, Alibeaj: Folëm për situatën në PD, ja interesi që shprehu
• Alibeaj zbulon pse PD nuk doli me 61 kandidatë në zgjedhjet lokale