Alibali: Shqipëria të mos lëshojë pe ndaj Greqisë, të mbrojë sovranitetin e saj

Çështja e detit me Greqinë është një nga çështjet më të rëndësishme ndërkombëtare për Shqipërinë.

Ministri i Jashtëm grek, Nikos Dendias ka deklaruar së fundmi se pret zhvillime brenda vitit 2023. Deklaratat e tij dhanë disa detaje të reja që, si gjithmonë, për këtë çështje, vijnë nga Athina dhe asnjëherë nga Tirana.

Për ekspertin e marrëdhënieve ndërkombëtare, Agron Alibalin, Greqia është në një pozicion maksimalist.

Në një intervistë për Euronews Albania ai tha se Athina po përpiqet të përfitojë detin nga Shqipëria.

“Pozicioni maksimalist grek është që ajo që i takon dheut kontinental, i takon dhe dheut ishullor mirëpo ky qëndrim maksimalist kundërshtohet nga e drejta ndërkombëtare dhe nga traktita dhe nga disa kazuse të rëndësishme. Kjo ndoshta shpjegon dhe arsyen se përse Greqia është në një ngutje të jashtëzakonshme për të mbyllur marrëveshjen me Shqipërinë në një pozitë të favorshme ndaj saj në mënyrë që të ndikojë ndaj Turqisë.

Kjo s’do të ketë asnjë efekt ndaj Turqisë. Nuk mund të pranojë Turqia që ka vijën bregdetare më të gjatë në Mesdheun lindor, që ishujt grek të ndikojnë dhe cenojnë të drejtat e saj sovrane. Nga ana tjetër edhe Shqipëria nuk ka pse të bëjë lëshime ndaj Greqisë, për një arsye ose një tjetër, duke futur këtu edhe negociatat për Bashkimin Europian,” – u shpreh Alibali.

LEXONI GJITHASHTU:

• Ekstradohen nga Italia e Greqia, drejt Shqipërisë, 3 persona të shpallur në kërkim
• Rritja e pagave, Malaj: Mund të na ndodhë si Greqia, burimi i fondit i paqartë