Alibeaj-Berishës: Largohu me pak fije dinjitet, demokratët të jenë alternativë e re

Deputeti i PD-së Enkelejd Alibeaj, ka deklaruar pas deklaratës që ka bërë sot ish-kryeministri Sali Berisha,i cili tha se do të nisin protestat pasi të bëjnë një analizë të zgjedhjeve të 14 majit.

Në një postim që ka bërë në rrjetet sociale, Alibeaj theksoi se Berisha kërkon të mbajë peng një pjesë të demokratëve dhe të përçajë PD.

Më tej ai theksoi se lideri demokrat duhet të largohet me aq pak dinjitet që i ka ngelur, sipas tij.

Me largimin e Berishës, Alibeaj thekson se demokratët do të fitojnë mundësinë për të qenë alternativë e re për shqiptarët.

“Humbësi i zgjedhjeve të 14 majit ka vijuar dhe sot serinë e përsëritjes së justifikimeve bajate që nuk ja hanë më as kandidatët dhe as besnikët e tij. I zhytur në mjerimin e mungesës së shpresës dhe alternativës, Sali Berisha vijon serinë e shpalljes së armiqve me shpifjet e zakonshme dhe banalitetin konstant, për të gjjthë ata që mendojnë ndryshe nga ai.  I dëshpëruar por i palodhur nga përpjekja për të përçarë PD, i rrënuar moralisht por i paepur në përpjekjen për të mbajtur peng një pjesë të demokratëve, me ligësinë e dikujt që koha dhe veprat ia kanë shkruar fundin e palavdishëm, ndaj Sali Berishës ka vetëm një zgjidhje: të largohet i braktisur dhe të heshtë duke marrë me vete edhe atë fije dinjiteti, nëse i ka mbetur. Kështu demokratët do të fitojnë mundësinë për të qenë alternativë e re për shqiptarët. Duke lënë pas të shkuarën dhe pa ngarkesat e korrupsionit familjar dhe të shpurës së tij, pesha e të cilave i shërbejnë veçse Ramës e të ngjashmëve të tij për ta mbajtur gjallë në politikë dhe që i kanë lënë demokratët në opozitë”-tha ai.

LEXONI GJITHASHTU:

• Ndeshjet e Kombëtares për Euro2024, Sadiku: Do jetë e vështirë, por kemi besim
• Emri| Si hakeri nigerian mashtroi biznesmenin shqiptar me vetëm një e-mail