Alibeaj kërkon mbledhjen e Këshillit të Mandeteve për Alqi Bllakon

Kryetari i komanduar i PD-së Enkelejd Alibeaj kërkon mbledhjen e Këshillit të Mandeteve në Kuvendin e Shqipërisë për të shqyrtuar mandatin e deputetit të PS, Alqi Bllako.

“Pasi jemi njohur nëpërmjet medias me kërkesën e SPAK për kërkesën për autorizim për procedim, kërkojmë mbledhjen e menjëhershme të Këshillit të Mandeteve në Kuvendin e Shqipërisë, për të shqyrtuar mandatin e deputetit të PS, Alqi Bllako, ndaj të cilit është vendosur masa e arrestit për aferën e inceneratorëve”, shkruan Alibeaj në një postim në Facebook.

Deputeti shprehet se PD është e vendosur për ta çuar deri në fund çështjen e inceneratorëve.

“Nuk duhet pritur më asnjë minutë. Koha është tani. Partia Demokratike është e vendosur për ta çuar deri në fund këtë çështje dhe inkurajon drejtësinë të zbardhë deri në fund vjedhjen e shekullit dhe të vendosë para drejtësisë të gjithë përgjegjësit, deri tek zyrtari më të lartë i përfshirë”,  thotë më tej Alibeaj.

SPAK ka lëshuar 9 urdhër-arreste për çështjen e inceneratorit të Fierit dhe Elbasanit si dhe ka kërkuar Kuvendit dhënie të autorizimit për arrestimin e deputetit të PS-së, Alqi Bllako.

Mes personave të përfshirë sipas SPAK është ish-ministri i Mjedisit Lefter Koka, i cili dyshohet se ka përfituar rreth 1.2 milionë euro ryshfet për ndërtimin e inceneratorit të Fierit. Mbi Kokën rëndon edhe akuza për falsifikim dokumentesh.

Ndërsa, deputeti Bllako akuzohet se në bashkëpunim me Kokën dhe Kryetarin e Komisionit të Shpronësimit, Pëllumb Abeshin, kanë falsifikuar dokumentet duke e cilësuar tokën arë si tokë truall për të rritur vlerën e dëmshpërblimit.

LEXONI GJITHASHTU:

• SPAK kërkon arrestimin e deputetit të PS-së
• PD i kërkon Ramës të mos bllokojë hetimet për inceneratorët