Alibeaj zbardh bisedën me Escobar: Temë e diskutimit ishin dhe zhvillimet në PD

Kryetari i komanduar i Partisë Demokratike, Enkelejd Alibeaj ka zbardhur disa nga temat e diskutimit me Zëvendës Ndihmës Sekretarin e SHBA-ve për Çështjet Europiane, Gabriel Escobar.

Përmes një postimi në facebook, Alibeaj bën me dije se i komunikoi zyrtarit të DASH shqetësimet lidhur me shitblerjen e votës, përdorimin në fushatë të administratës publike, përdorimin e të dhënave personale dhe buxhetit të shtetit në funksion të zgjedhjeve.

Alibeaj shton se pjesë e bisedës ishte dhe situata në PD, ku e siguroi për qëndrimin konstant të kësaj force politike ndaj personave non-grata.

“Zhvillova sot një takim me Zëvendës Ndihmës Sekretarin e SHBA-ve për Çështjet Europiane dhe i Dërguari i Posaçëm për Ballkanin Perëndimor, Z. Gabriel Escobar.

Gjatë bisedës prekëm tema të rëndësishme të zhvillimeve të fundit, ku u ndalëm tek pregatitjet e PD për fushatën zgjedhore dhe problematikat e këtyre zgjedhjeve. Theksova refuzimin e qeverisë për të adresuar në Kodin Zgjedhor rekomandimet e ODHIR. Përveç kësaj i bëra me dije shkeljen që po ndodh aktualisht nga qeveria të rekomandimeve të ODHIR lidhur me shitblerjen e votës, përdorimin në fushatë të administratës publike, përdorimin e të dhënave personale dhe buxhetit të shtetit në funksion të zgjedhjeve e sidomos lidhur me pastërtinë e figurës së kandidatëve. Temë e bisedës ishin dhe zhvillimet në Partinë Demokratike, dinamikat e muajve të fundit dhe qëndrimi konstant për çështjen e personave non grata jo vetëm në PD, por në të gjithë spektrin e politikës shqiptare.

E sigurova zotin Eskobar për vullnetin e PD në bashkëpunimin me aleatin tonë kryesor, duke i konsideruar SHBA si mbështetës të angazhuar për Shqipërinë dhe shqiptarët”, tha Alibeaj.

LEXONI GJITHASHTU:

• Takimi i Escobar në selinë e PL-së, Meta zbulon çështjet që u diskutuan
• Tiranë: Escobar bën thirrje për kandidatë me integritet në zgjedhje
• Begaj pret Escobar: SHBA rol të pazëvendësueshëm në garantimin e paqes në rajon