VIDEO/ Ambasada e SHBA-së në Kosovë uron 18-vjetorin e Pavarësisë

Të martën, Kosova shënon 18-vjetorin e pavarësisë, dhe me këtë rast Ambasada e Shteteve të Bashkuara të Amerikës në Kosovë ka vlerësuar bashkëpunimin e ngushtë dhe marrëdhëniet e forta mes dy vendeve.

Në një postim në rrjetet sociale, E Ngarkuara me Punë e Ambasadës së SHBA-së në Kosovë, Annu Prattipati, përmes një mesazhi video, thekson se dy vendet qëndrojnë të bashkuara për të ndërtuar një të ardhme të sigurt dhe prosperuese për Kosovën, duke i uruar qytetarët në emër të Shteteve të Bashkuara të Amerikës.

Annu Prattipati, rikujtoi se partneriteti mes dy vendeve nisi para pavarësisë, në vitin 1996, me hapjen e zyrës së parë amerikane në Prishtinë. Teksa këtë vit SHBA-ja shënon 250-vjetorin e saj, ajo theksoi se pret zgjerimin e bashkëpunimit mes dy vendeve në tregti, investime dhe forcimin e lidhjeve të sigurisë, duke përkrahur një të ardhme shumetnike dhe demokratike për Kosovën.

“Ndërsa Kosova shënon 18 vjet pavarësi dhe Shtetet e Bashkuara festojnë 250 vjet pavarësi, ne qëndrojmë së bashku — ndërsa Kosova vazhdon të ndërtojë një të ardhme të sigurt dhe të begatë”, shkruhet në postim.

Po ashtu, Presidenti amerikan, Donald Trump, e ka uruar Kosovën për 18-vjetorin e shtetësisë, duke rikonfirmuar mbështetjen e palëkundur të SHBA-së për sovranitetin dhe integritetin territorial të vendit, bëri të ditur Presidenca e Kosovës.

Në letrën e tij, Trump përgëzon Kosovën për pjesëmarrjen në Bordin e Paqes dhe për mbështetjen në përpjekjet e SHBA-së për zgjidhjen e sfidave globale, përfshirë situatën në Ukrainë, Gazë dhe vende të tjera.

“Teksa marrëdhënia mes dy vendeve vazhdon të rritet, ne mirëpresim zgjerimin e partneritetit përmes bashkëpunimit tregtar dhe investimeve. Shtetet e Bashkuara janë të gatshme të punojnë së bashku me Kosovën për të avancuar paqen dhe stabilitetin për të mirën e përbashkët”, thuhet mes të tjerash në letër.

Që nga viti 1998, SHBA-ja ka ndarë mbi 2 miliardë dollarë për Kosovën, duke mbështetur zhvillimin dhe stabilitetin e vendit.