Ambasada e SHBA uron kryetaren e re të GJK: Fokus në sundimin e ligjit dhe në luftën kundra narkotrafikut

Ambasada e Shteteve të Bashkuara në Tiranë ka reaguar pas emërimit të kryetares së re të Gjykatës Kushtetuese, Fiona Papajorgji.

Në një deklaratë zyrtare, e Ngarkuara me Punë, Nancy VanHorn, ka përgëzuar Papajorgjin dhe ka theksuar mbështetjen e vazhdueshme të SHBA-së për institucionet e sundimit të ligjit në Shqipëri.

“Sot, e Ngarkuara me Punë Nancy VanHorn përgëzoi Kryetaren e sapoemëruar të Gjykatës Kushtetuese, Fiona Papajorgji, dhe diskutoi se si mbështetja afatgjatë e Shteteve të Bashkuara për institucionet e sundimit të ligjit në Shqipëri avancon prioritetet e Presidentit Trump: çmontimin e rrjeteve të narkotrafikut dhe krijimin e kushteve të barabarta për bizneset amerikane”, thuhet në reagim.

Ambasada amerikane nënvizon gjithashtu rolin kyç të Gjykatës Kushtetuese në garantimin e drejtësisë dhe funksionimin e shtetit ligjor.

“Gjykata Kushtetuese luan një rol të rëndësishëm në garantimin e drejtësisë për qytetarët e Shqipërisë, në vënien para përgjegjësisë të atyre që shkelin ligjin dhe në ruajtjen e një sistemi ligjor të drejtë dhe të parashikueshëm, në mënyrë që bizneset amerikane të mund të lulëzojnë”, thekson më tej deklarata.