Ambasadori i SHBA në Kosovë për planin e BE-së: S’ka marrëveshje më të mirë

Ambasadori i SHBA në Kosovë, Jeffrey Hovenier, tha se plani i BE për normalizimin e marrëdhënieve Kosovë-Serbi “është marrëveshja më e mirë në dispozicion” që do të çojë në njohje të ndërsjellë midis dy vendeve.

Ai tha se gjasat për njohje reciproke tani “nuk janë shumë të mëdha”, për shkak të qëndrimit të Serbisë, por kujtoi se plani i BE-së është i përkohshëm.

Ai i bëri komentet në një takim me gazetarë, të mërkurën në Prishtinë.

“Më duhet të jem i qartë, SHBA vlerëson se, në këtë moment, nuk ka marrëveshje më të mirë në dispozicion. Ky është një hap i rëndësishëm përpara”, tha Hovenier.

Kryeministri i Kosovës, Albin Kurti, dhe presidenti i Serbisë, Aleksandar Vuçiç, e kanë pranuar në parim planin e BE-së, i cili nuk parasheh njohje të ndërsjellë mes dy vendeve, por angazhimin e palëve që të mos e pengojnë njëra-tjetrën në proceset integruese.

Hovenier tha se fokusi kryesor i tyre tani duhet të jetë te “zbatimi i suksesshëm dhe efektiv” i planit – për të cilën Kurti dhe Vuçiç do të takohen më 18 mars në Ohër të Maqedonisë së Veriut.

Nëse Kosova kontribuon në mënyrë konstruktive në këtë drejtim, tha ai, SHBA “do t’i ripërtërijë përpjekjet” për ta ndihmuar vendin që t’i bashkohet Partneritetit të NATO-s për Paqe.

LEXONI GJITHASHTU:

• Borrell: BE dhe SHBA kanë bashkëpunim të mirë për dialogun Kosovë-Serbi
• “Kosova humbet”, Behgjet Pacolli: S’ka njohje reciproke, Asociacioni do krijohet