Amnistia penale, Sefa: PD s’bëhet pjesë e pazarit, mesazhi që i dërgohet drejtësisë

Sekretari për Çështjet Ligjore në Partinë Demokratike, Indrit Sefa, ka reaguar në lidhje me deklaratën e ministrit të Drejtësisë Ulsi Manja, i cili tha se amandamentet e propozuara në Komisionin e ligjeve për amnsitinë penale parashikojnë dhe uljen e dënimit për të dënuarit nga GJKKO.

Sefa në reagimin e tij thotë se PD nuk do të bëhet pjesë e miratimit të këtij projektligji që sipas tij synon të amnistojë të korruptuarit.

Sefa thekson se përmes këtij projektligji maxhoranca kërkon të ushtrojë presion ndaj drejtësisë, duke i dërguar mesazhin se edhe nëse dënohen të korruptuarit ata do të amnistohen.

Postimi i plotë:

Sot ministri i drejtësisë doli pa u skuqur dhe pa u zverdhur si burracak për të justifikuar vendimin që synon të annistojë të korruptuarit e tyre. Me një akt tinzar ne ditën e fundit të diskutimit ndryshuan projektligjin për amnistinë duke i çuar dhe një mesazh kriminal SPAK dhe Gjykatës, se ata mund të denojnë të korruptuarit, por Edi Rama do ti falë ata. Kjo është kriminale.

Sot ministri anti-SPAK duhet tu tregonte shqiptarëve:

Kush ka kërkuar shfuqizimin e germës c) pika 2 te neni 5?

Kush e ka kërkuar ndryshimin e pikës 3 të nenit 6 ?

Për cilët persona janë kërkuar këto ndryshime?

Pse u ndryshua dje me fshehtësi dhe nuk u diskutua më herët?

Me amendamentet anti-SPAK synohet që çdo i korruptuar, çdo hajdut tenderash publikë, çdo hajdut pronash, çdo zullumqar i kësaj qeverie i dënuar me vendimim të formës së prerë, të përfitojnë ulje denimi 1 vit meshkujt dhe 1.5 vite femrat.

Me këtë amendament  mundësohet që funksionarët publikë të përfitojnë nga ndjekja penale dhe nga hetimet ndaj tyre.

Kjo natyrisht është në vazhdën e përpjekjeve të Edi Rames për të kontrolluar, për t’i bërë presion dhe për të demotivuar drejtësinë. PD nuk do bëhet kurrë pjesë e këtij pazari të ndyrë dhe kërkon tërheqjen e këtyre ndryshimeve, përfshirjen në amnisti të të të gjithe atyre qe protestuan kundër kesaj qeverie, për të mbrojtur shtëpitë dhe pronat e tyre.

LEXONI GJITHASHTU:

• Amnistia penale, Manja: Ulje të dënimit përfitojnë dhe të dënuarit nga GJKKO
• Amnistia| Basha: Rama planifikon të lirojë zyrtarët e korruptuar, PD nuk bëhet pjesë