Apeli i GJKKO lë në fuqi dënimin me 25 vite burg ndaj Gjergj Cukalit

Gjykata e Posaçme e Apelit për Korrupsionin dhe Krimin e Organizuar ka lënë në fuqi dënimin me 25 vite burgim për Gjergj Cukalin, i njohur për lidhjet e tij me grupin e Emiljano Shullazit. Cukali u shpall fajtor për vendosjen e eksplozivit në automjetin e biznesmenit Gjon Mena, si pjesë e veprimtarisë së një grupi të strukturuar kriminal.

Vendimi përfshin disa të pandehur, edhe E.J., i cili u pranua si bashkëpunëtor i drejtësisë dhe përfitoi ulje dënimi, duke u dënuar përfundimisht me 7 vite burg.

Po ashtu, B.D. u dënua me 18 vite burgim për veprën penale të tentativës së vrasjes me dashje, në kuadër të grupit kriminal, në dëm të shtetasit A.B. Gjykata vendosi të bashkojë dënimet ndaj tij në një dënim të vetëm prej 18 vitesh.

Njoftimi i plotë:

Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët Tereza Merkaj (kryesuese), Engert Pëllumbi (anëtar) dhe Igerta Hysi (anëtare),  më datë 09.07.2025, shpalli vendimin lidhur me çështjen e regjistruar me nr. 14 akti, datë 21.01.2025 regjistrimi, mbi ankimin e paraqitur nga të pandehurit Gjergj Cukali,  E.J., E.J., B.D., P.(B.)P., dhe F.B., ndaj vendimit nr. 49, datë 31.07.2024 të Gjykatës së Posaçme të Shkallës së Parë për Korrupsionin dhe Krimin e Organizuar, dhe vendosi:

31. Lënien në fuqi të vendimit nr. 49, datë 31.07.2024 të Gjykatës së Posaçme të Shkallës së Parë për Korrupsionin dhe Krimin e Organizuar me këtë ndryshim:
32. Në aplikim të nenit 28/7 të K.Penal të pandehurit E.J. në cilësinë e bashkëpunëtorit të drejtësisë, i ulet dënimi dhe përfundimisht dënohet me 7 (shtatë) vite burgim.
33. Dënimin e të pandehurit B.D. për kryerjen e veprës penale “Vrasja me dashje”, në dëm të shtetasit A.B., mbetur në tentativë dhe kryer në bashkëpunim në kuadër të grupit të strukturuar kriminal, parashikuar nga nenet 76-22-28/4 të K.Penal dhe në zbatim edhe të nenit 334/1 të K.Penal, me 18 (tetëmbëdhjetë) vjet burgim.
34. Në bashkim të dënimeve, në bazë të nenit 55 të Kodit Penal, dënimin e të pandehurit B.D. me një dënim të vetëm prej 18 (tetëmbëdhjetë) vjet burgim.
35. Shpenzimet gjyqësore edhe për gjykimin në nivel apeli i ngarkohen solidarisht të pandehurve.

III. Kundër këtij vendimi mund të bëhet rekurs në Gjykatën e Lartë brenda 45 ditëve, duke filluar ky afat nga e nesërmja e njoftimit të vendimit të arsyetuar.

LEXONI GJITHASHTU:

• Pronarët e jet-skive procedohen penalisht pas incidentit me turistët francezë
• Rama ndan foton e hapësirave të liruara te 21 Dhjetori: Nuk është më tokë e xanun