Apeli i mjekes: 300 fëmijë talasemikë kanë nevojë për gjak

Dhuro gjak, shpëto jetë! Është thirrja që i bëhet çdokujt që është i shëndetshëm, megjithatë në qendrën e transfuzionit të gjakut prej kohësh karriget janë bosh.

“Nevojat për gjak janë të vazhdueshme dhe kërkesat në rritje. Jo gjithmonë kemi numrin e duhur të dhuruesve. Muajt e verës gjithmonë kanë qenë problematikë. Por dhe pandemia ka bërë punën e vet”, thotë Ejona Braho, transfuziologe.

Personat më në nevojë për gjak janë fëmijët talasemikë. Rreth 300 fëmijë duhet të marrin gjak të paktën një herë në javë. Për t’i dhuruar të gjithëve, mjekja shprehet se jo gjithmonë ndodh.

“Numri i personave me talasemi është rritur, ndërkohë për fat të keq numri i dhurimeve vullnetare është ulur. Ndonjëherë ndodh që nuk i plotësojmë dot me gjak, kështu që bëj edhe një herë thirrje për t’i ardhur në ndihmë çdo pacienti me talasemi apo të hospitalizuar”, – thotë ajo.

Dhurimi i gjakut kërkon vetëm 20 minuta kohë, nuk përbën asnjë rrezik për shëndetin dhe shpëton jetë.