Pjesë e dosjes së Breçanit/ Arrestimi i Zenelit në Spanjë, vjen reagimi i Policisë

Policia ka reaguar pas arrestimit të Ismail Zenelit në Spanjë, i cili ishte shpallur në kërkim nga SPAK, pasi dyshohet të ketë qenë pjesë grupit ku u arrestua edhe Erzen Brecani.

Ismail Zeneli është personi që dyshohet se donte të vriste vëllezërit Nela për hakmarrje pasi besonte se në vitin 2013 i kishin vrarë në sy të tij, vëllain me emrin e ndryshuar, Xhem Krasniqi, krim që kishte ndodhur në Britaninë e Madhe.

Ky grup u zbulua pas zbardhjes se radhës te komunikimeve ne aplikacionin Sky ECC, të mbërritura me letër-porosi nga autoritetet gjyqësore franceze.

Përmes një njoftimi, Policia thotë se vijojnë procedurat për ekstradimin e Ismailit në Shqipëri.

Po ashtu mësohet se Ismail Zeneli njihet edhe me emrin Luan Sadria.

Policia e Shtetit

Finalizohet një tjetër operacion i përbashkët me partnerët spanjollë, për kapjen e shtetasve të shpallur në kërkim ndërkombëtar.

Në kuadër të operacionit “Madridi”, u lokalizua dhe u arrestua në Madrid, për t’u ekstraduar në Shqipëri, një 49-vjeçar i akuzuar nga GjKKO-ja, për vepra penale kundër personit dhe në fushën e narkotikëve, të kryera në kuadër të grupit kriminal.

Si rezultat i sigurimit të inteligjencës policore, nga strukturat hetimore të Policisë së Shtetit dhe shkëmbimit të saj, në kohë reale, ndërmjet Interpol Tiranës dhe Interpol Madridit, Policia spanjolle organizoi dhe finalizoi operacionin policor të koduar “Madridi”.

Në kuadër të këtij opeacioni u lokalizua dhe u arrestua, me qëllim ekstradimin në Shqipëri, shtetasi I. Z. alias L. S., 49 vjeç.

Gjykata e Posaçme kundër Korrupsionit dhe Krimit të Organizuar, në nëntor të vitit 2023, ka caktuar masën e sigurisë “Arrest në burg” për këtë shtetas, për veprat penale “Sigurimi i kushteve dhe mjeteve materiale për të kryer vrasje”, “Trafikimi i lëndëve narkotike”, “Grupi i strukturuar kriminal” dhe “Kryerja e veprave penale nga organizata kriminale apo grupi i strukturuar kriminal”.

Interpol Tirana vijon punën për ekstradimin e shtetasit I. Z. alias L. S., në vendin tonë.

LEXONI GJITHASHTU:

• Breçani në burg, djali në kërkim. Lista e plotë e të arrestuarve dhe atyre në kërkim
• Si u arrestua në tribunën VIP të “Air Albania” Shefi i Krimeve, akuzat për Breçanin
• Kush janë efektivët e arrestuar në operacionin e SPAK, u shoqërua dhe Erzen Breçani